شرح مصور لطريقة اللتحكم لأهم الخيارات في راوتر الوايرلس Linksys

بسم الله الرحمن الرحيم

السلام عليكم ورحمة الله وبركاته

موضوع مفيد واللي يتعلق بالتحكم في خيارات الراوتر Linksys ،


راح نتطرق اليوم لأكثر من شغله لها علاقة بالتحكم في خيارات الراوتر ، وطبعا فيه وايد خيارات بس اخترت الشائع اللي يسألون عنه الأعضاء بكثره واللي

يعني من الضروري نعرفه (أساسيات)،، وهي كالتالي:

1- تغيير اعدادات كيوتل ADSL مثل اليوزر نيم والباسورد.

2- وضع باسورد للشبكة اللاسلكية ، وتغيير اسم الشبكة اللاسلكية .

3- تغيير اسم المستخدم وكلمة المرور لموقع التحكم الخاص بالراوتر.

4- عرض حالة الإنترنت والإتصال.

5- عرض الأجهزة المتصلة بالشبكة لاسلكيا وسلكيا.

.
.
.
.

أول موضوع هو تغيير اعدادات كيوتل ، فرضا لو مثلا باسوورد الانترنت تغير، او مثلا بعض الناس يشدون من بيت لبيت جديد في منطقة أخرى، طبعا أحيانا البداله الجديده تكون لها اعدادات أخرى فيحتاج انه نغيير شي بسيط من اعدادات الراوتر، ( وهالشي بعد مفيد في أول مره يتم تركيب فيها الراوتر )

وقبل كل شي لازم نتصل على 111 بعدين 1 للعربية بعدين 3 للإنترنت ونطلب منهم المعلومات التالية بعد ماتعطيهم رقم البيت (اللي فيه اشتراك ADSL) وممكن احيانا يطلبون الرقم الشخصي باسم هذا البيت (في حال طلب اسم المستخدم وكلمة المرور). والمعلومات الاساسية هي:

Encapsulation
Multiplexing
Virtual Circuit

اضافة الى ذلك لازم يكون عندنا الـ

User Name
Password

وهم عادة يكونون نفس الشي مايتغيرون الا اذا تطلب الامر ذلك ، المهم بالنسبة للمعلومات Encapsulation ماراح ادخلكم في متاهات وايد بس حلو انه الواحد ياخذ فكره،، وبشكل مبسط الEncapsulation هي الطريقة او الاستاندر اللي يتم من خلالها ارسال البيانات من جهازك إلى كيوتل، وطبعا هالشي يعتمد على البدالة وبالتالي كيوتل لازم تزودنا بهالشي.

Multiplexing هي الطريقة اللي يتم فيها مشاركة البيانات وهو يعتمد هنا في كيوتل على نوع الاتصال Encapsulation ،، و بكل بساطة اذا كان الEncapsulation نوعه PPPoA يكون Multiplexing هو VC ،، واذا كان نوع الEncapsulation هو PPPoE يكون Multiplexing هو LLC ..

وبالنسبة Virtual Circuit عادة تكون قيمتين ثابتتين اللي هم 8 و 35،، وراح توضح بالصورة

بعد الكلام الممل نجي الحين للصور .. لما نبي نفتح صفحة اعدادات الراوتر نتأكد من توصيل الجهاز بالراوتر بالشكل الصحيح ( واير أو وايرلس ) ونفتح الموقع التالي [فقط الأعضاء المسجلين والمفعلين يمكنهم رؤية الوصلات . [اخي /اختى العزيز/هـ لايمكنك رؤية الرابط الا بعد الرد ]] وراح يطلب منا يوزر نيم وباسوورد ،، اذا ماغيرناه قبل عادة يكون اليوزر نيم والباسورد هو admin والباسورد

admin أو123456 ... [ ونتأكد كذلك انه مب حاطين اعدادات بروكسي كيوتل proxy.qatar.net.qa ] ..





الارقام بالصورة:

1- نوع الاتصال Encapsulation.

2- Multiplexing ويعتمد على الEncapsulation مثل ماذكرت لكم من شوي.

3- Virtual Circuit وهم عادة 8 / 35.

4- اليوزر نيم والباسورد لإشتراك كيوتل للإنترنت.

مجرد مانسوي حفظ وعلى اساس انه الاعدادات صح، المفروض الاتصال ببدالة كيوتل يكون ناجح.

.
.
.
.

ثاني شغله وهي مهمة جدا ً وكثير منا يريد تعلمها وهي كيفية تغيير اسم الشبكة اللاسلكية / وضع كلمة مرور / الغاء كلمة المرور. اسم الشبكه اللاسلكية بشكل افتراضي اسمها Linksys وممكن يتم تغييرها بأي اسم للتمييز بينها وبين الشبكات الأخرى لو مثلا الميلس فيه وايرلس الجيران وجي .. ونقدر مثلا نحط اسم العائلة ولا اسم الشخص ولا اسم مبهم .. الخ ،، والطريقة هي كالتالي :

ندخل صفحة التحكم [فقط الأعضاء المسجلين والمفعلين يمكنهم رؤية الوصلات . [اخي /اختى العزيز/هـ لايمكنك رؤية الرابط الا بعد الرد ]]

ونروح كما هو بالشكل



توضيح الارقام بالصورة :

1- اختيار التحكم بالوايرلس .

2- تفعيل / تعطيل الشبكة اللاسكلية بالكامل .

3- تغيير اسم الشبكة .

الحين لو نبي نحط باسوورد للشبكة ، الطريقة بسيطة جدا ً وهي كالتالي :



توضيح الارقام بالصورة :

1- اختيار التحكم بالوايرلس .

2- اختيار الفرع ( أمان الشبكة اللاسلكية ).

3- تفعيل كلمة المرور ، واحبذ دائما تختارون النوع الشائع WPA- Personal .

4- تكتبون هنا الباسوورد اللي تبونه ولازم يكون أقل شي 8 حروف أو ارقام .

ووبس تسوون حفظ والباقي تخلونه مثل ماهو بدون تغيير .

.
.
.
.

ثالث جزء وهو تغيير كلمة المرور واسم المستخدم للوحة التحكم الخاصة بالراوتر ، يعني المقصود هذي



طبعا هالشي بيفيدنا لو مثلا حد من برع البيت لقط الشبكة من لابتوبه وحاب يخرب الشبكه ، ممكن يدخله بكل سهوله لانه اسم المستخدم وكلمة المرور الافتراضيه عاده تكون نفس الشي بين كل الراوترات، فاحنا نغيره علشان محد يدخل ويخربه ، الطريقة موضحه بالشكل التالي:



توضيح الارقام بالصورة :

1- اختيار الإدارة Administration .

2- كتابة اسم المستخدم اللي تبيه.

3- كتابة كلمة المرور .

4- اعاده كتابة كلمة المرور .

5- هذي الخاصيه حلوه ، وتعطيلها يزيد من حماية الشبكه ، بوضحها لكم بكل بساطة ، الشبكة فيها طريقتين للإتصال بالانترنت ، بالواير ، بالوايرلس ،،

ممكن احنا نخلي الدخول إلى لوحة التحكم فقط عن طريق الواير وممكن نخليها عن طريق الوايرلس ،، فإذا رقم 5 خليناها Disable أي حد متصل بشكل لاسلكي مابيقدر يدخل لوحة تحكم الوايرلس وممكن هالشي يغنينا عن تغيير اسم المستخدم وكلمة المرور، بس احيانا البيت مثلا كلهم يستخدمون اللاسلكي، فهالخيار مهم والأفضل نغير اسم المستخدم وكلمة المرور في حال الرغبه في تغيير الاعدادات لاحقاً..

.
.
.
.

رابع جزء وهو جزء مهم كذلك لمعرفة حالة الاتصال بشبكة الانترنت ، هالشي بيفيدنا لو مثلا نبغي عنوان IP الخاص بالانترنت، او مثلا نبي نشوف حالة

الاتصال ..الخ والشكل التالي يوضح ذلك:



1- نروح على Status.

2- نختار Gateway . وهو الجزء المسؤول عن توصيل الشبكة الداخليه للشبكة الخارجية (الانترنت).

3- Up يعني الاتصال شغال ، والعنوان هو عنوان الIP للإنترنت.

4- لعزل الشبكة المحلية عن شبكة الانترنت ( قطع الاتصال بالانترنت ).

5- لتوصيل الشبكة بشبكة الانترنت (الاتصال بالانترنت). يعني لو رقم 3 Down ممكن نحاول نسوي الزر رقم 5 يعيد الاتصال ، واذا ماصار معناه فيه خلل

بالاعدادات أو خلل في كيوتل .

.
.
.
.

خامس وآخر جزء وهو يتعلق بعرض الأجهزة المتصلة لاسلكيا ً بالشبكه ، نقدر طبعا نعرف كل جهاز متصل بالشبكة السلكية واللاسلكية ونقدر نطلع عناوين الIP المحليه داخل الشبكة، ونقدر نعرف من خلالها لو الانترنت مستغل من قبل أشخاص آخرين ، نروح نسوي أي اجراء مثل تغيير كلمة مرور الوايرلس وجذي ..

الطريقة سهله جدا وهي موضحه بالأشكال التالية:



الارقام بالصورة:

1- نروح على Status.

2- نختار Local Network يعرض لنا تفاصيل الشبكة المحلية داخل المنزل .

3- DHCP من خلاله نقدر نشوف الأجهزة المتصله واللي خذت عناوين IP محليه من الراوتر وقاعده تستخدم الشبكة.

4- يعرض لنا عناوين الIP الفعليين المتصلين بالوقت الحالي.

وهاي الصوره تظهر لما نضغط على زر DHCP Client Table



وهذي الصورة تظهر لما نضغط على زر APRA table



.
.
.
.

الحمد الله خلصت لكم شرح أهم خصائص وخيارات التحكم لراوتر Linksys ..

دمتم بخير